Weltmeeschterschaften am Eenzelfueren zu München-Riem
Vum 1. bis de 6. September hunn d’Weltmeeschterschaften am Eenzelpäerdfueren an der bayerescher Haaptstad stattfonnt, eng Disziplin an där d’Lëtzebuerger Equipe ënner der Féierung vun der Famill Schiltz zu de beschten op der Welt gehéiert.
Déi uewe genannte Equipe, déi aus dem Nicolas Kandel, dem Franz Schiltz an der Marie Schiltz besteet, huet am Ganzen 295,98 Punkten erreecht a koum domat op déi 6. Plaz vun uechtzéng Natiounen, déi um Start waren. D’Schwäiz huet gewonnen (251,97), dat virun Holland (258,09) a Frankräich (266,99).
An der Eenzelkonkurrenz hunn d’Marie Schiltz an de Frodo et och an d’Top 10 gepackt a koumen schliisslech op déi 8. Plaz vun iwwer achtzeg Konkurrentinnen a Konkurrenten, mat 140,88 Punkten. Hei hunn de Stefan Ulrich (127,57) an de Mario Gandolfo (128,93) fir eng Schwäizer Duebelvictoire gesuergt an d’Anne Unzeitig aus Däitschland huet de Podium komplettéiert (131,19).
